அற்றைக் கிரை — JR விளக்கவுரை

By Smt Janaki Ramanan, Pune

To read the meaning of the song nachcharava mendru (நச்சரவ மென்று) in English, click the underlined hyperlink.

முன்னுரை

"அற்றைக் கிரை தேடி" என்று தொடங்கும் காஞ்சி மாநகர் திருத்தலப் பாடல். எளிமை போல் தோன்றும் வலிமையான பாடல். ஞானச் சாற்றினை அல்லவா பிழிந்து தருகிறார்! அது அருணகிரிநாதரின் அனாயாசம். சுற்றி வளைக்காமல், முதிர்ந்த, முழுமையான வெற்றிக் கனி பறிக்க வேலனை வேண்டும் பாடல். இகத்திலிருந்து பரத்துக்கு ஏற்றிவிடும் பாடல். இப்படித் திருப்புகழ் எங்கும் மணம் மிகுந்த ஞானப் பூக்களைத் தூவி விடுகிறார் அருணகிரிநாதர். நம் மனதும் மணம் பெறுமோ!

நச்சரவ மென்று — JR விளக்கவுரை

By Smt Janaki Ramanan, Pune

To read the meaning of the song nachcharava mendru (நச்சரவ மென்று) in English, click the underlined hyperlink.

முன்னுரை

"நச்சரவ மென்று" என்று தொடங்கும் காஞ்சிபுரம் திருத்தலப் பாடல். மற்றுமொரு அகத்துறைப் பாடல். அகிலாண்ட கோடி பிரம்மாண்ட நாயகனைத் தலைவனாகவும், முருக பக்தனை தலைவியாகவும் உருவகம் செய்துச் செந்தமிழ்த் தேனாய் மலரும் திருப்புகழ் பாடல். முருகனுக்காக பக்தன் ஏங்கும் ஏக்கத்தை ஓரளவுக்குக் காட்டுகின்ற வழிமுறை தான் இந்த அகத்துறை. சிற்றின்பம் சொன்னால் "சட்"டெனப் புரிந்துவிடுவதாலே இதைச் சொல்லிப் பேரின்ப நிலைக்குக் கூட்டிச் செல்லும் முயற்சி. திரும்பத் திரும்ப எடுத்துச் சொன்னால் தானே மனித மனம் திருந்துகிறது! அதனால், வெவ்வேறு பாடல்களில், வெவ்வேறு விதமாகச் சொல்கின்ற நயம்.

சீசி முப்புரக் காடு — JR கருத்துரை

By Smt Janaki Ramanan, Pune

To read the meaning of the song cheechi muppura (சீசி முப்புர) in English, click the underlined hyperlink.

முன்னுரை

காமக் கோட்டத்தின் கந்தா! அத்திவரதரின் அழகிய மருகா! சரணம். "சீசி முப்புரக் காடு நீறெழ" என்று தொடங்கும் காஞ்சிபுரம் திருத்தலப் பாடல். பக்தர்களுக்காக ஒளிமயமான மலர்ப்பாதை விரித்து வைத்திருக்கிறான் முருகன். அதில் நடந்தால் ஆணவம், கன்மம், மாயை என்ற மாசுகள் எரிந்து போகும். பஞ்ச கோசங்கள் தாண்டிய ஆன்ம ஸ்வரூபம் காட்சி தந்துவிடும். சூரிய ஞானப் பெருவெளியில் சஞ்சாரம் செய்யும் பேறு கிட்டும். முக்தி வாசல் திறக்கும். அநுபூதியாம் பேரானந்த அனுபவம் மலர்ந்து விடும். இவையெல்லாம் புரியாமலே வாழ்வின் பெரும் பகுதி வீணாகி விட்டதே, வேலா! பந்த பாசங்கள் அகற்றி, உன் மேல் மாறாத நேசத்தை நெஞ்சிலே நிறுத்தி வைப்பாய் – என அருணகிரிநாதர் வேண்டுகின்ற பாடல். மனித நெஞ்சத்தை நன்னிலமாக்கி, அதில் பக்தியை விதைக்க அவர் பாடுபடுவது தான் ஒவ்வொரு பாடலுமே. பாடலின் இரண்டாம் பகுதியில் அவனுடைய புகழ் என்னும் தேனை அருந்தச் செய்து விடுவதாலே சொல்லொணா மன நிறைவு.

வம்பறாச் சில கன்னமிடும் -- JR கருத்துரை

By Smt Janaki Ramanan, Pune

To read the meaning of the song vambaRa(வம்பறாச் சில) in English, click the underlined hyperlink.

முன்னுரை

காஞ்சித் தலைவனே சரணம். "வம்பறாச் சில கன்னமிடும்" என்று தொடங்கும் காஞ்சிபுரம் திருத்தலப் பாடல். 'நகரேஷு காஞ்சி ' எனக் கொண்டாடப்படும் எழில் நகரம். ஆன்மீகச் சிகரம். பஞ்ச பூத ஸ்தலங்களில் பொறுமைக்கும், அருமைக்கும், பெருமைக்கும் எடுத்துக்காட்டான நிலமாகிய மண்ணின் ஸ்தலம். முக்தி வாசல் திறக்கும் ஏழு புனித ஸ்தலங்களில் ஒன்று. ஏகன் அவன் என உணர்த்த மிக உயர்ந்து நிற்கும் ஏகாம்பரேஸ்வரர் ஆலய கோபுரம். கட்டிடக் கலையின் நுணுக்கங்கள் கொட்டிக் கிடக்கும் கைலாசநாதர் கோவில். வர மழை பொழியும் வரதராஜன் ஆலயம். ஞானத்தை ஒரு விழியாகவும், கருணையை மறு விழியாகவும் கொண்டு அன்னை காமாட்சி ஆட்சி செய்யும் ஸ்தலம். கணித வல்லுனரையும் பிரமிக்க வைக்கும் ஸ்ரீசக்ர அமைப்பு. சிவசக்தி ஐக்கியமாய் அது அகிலம் காக்கும் சிறப்பு. அன்னை தானே தவமியற்றி வழிகாட்டும் தனித்துவம் கொண்ட தலம். கந்தக் கோட்ட சுந்தரக் கந்தன் அருணகிரியாரைச் சொக்க வைத்துக் காத்தம் போல் இழுத்த தலம். அவர் எண்ணத்தில் பூத்து மலர்ந்தன வண்ணத் தமிழ்ப் பாடல்கள் இந்தப் பாடலில் சீரிய சமூக சிந்தனை கொண்டவராய், விதண்டா வாதம் கடந்த சமரச சன்மார்க்கம் வேண்டுகிறார் அருணகிரியார். முருகன் அடியார்களுக்கு அது இயல்பு என உணர்த்துகிறார்.

பரிமள மிகவுள — JR கருத்துரை

By Smt Janaki Ramanan, Pune

To read the meaning of the song parimaLa migauLa (பரிமள மிகவுள) in English, click the underlined hyperlink.

முன்னுரை

ஆனைக்காவின் கவினே சரணம். "பரிமள மிகவுள" என்று தொடங்கும் திருவானைக்கா திருத்தலப் பாடல். மனிதனின் ஆசைகள் – குறிப்பாகப் பெண்ணாசை – அனைத்தையும் தராசின் ஒரு தட்டில் அடுக்கி வைத்தாலும், ஐயன் முருகன் அருள் மறு தட்டிலே மலர்ந்து விட்டால், அந்தத் தட்டு அவன் கனத்த கருணையால் அழகாய்க் கீழே இறங்க, பக்தனுக்காக அவன் இரங்க, மனிதன் கரையேறும் அதிசயம் நடந்து விடுகிறது என்கிறார் அருணகிரியார். பெண்ணாசை என்னும் பெருநெருப்பு மனித வாழ்வை முழுவதுமாய் எரித்து முடித்து விடுகிறது. அந்தச் சாம்பலிலிருந்து வாழ்வைத் துளிர்த்துத் தழைக்க வைக்கும் அற்புதத்தை அருணகிரியாரின் வாழ்க்கையில் வள்ளல் நடத்திக் காட்டினான். துராசை தன்னைக் கொண்டு வந்து நிறுத்திய அவலநிலையைப் படம் பிடித்துக் காட்டினால் தான் கந்தன் கருணையின் ஆழம் புரியும் என்பதை உணர்ந்து, தன்னையே சவுக்கடி போன்ற சொற்களால் தாக்கிக் கொள்கிறார் அருணகிரியார். அது மனித மனங்களில் நல்லதொரு தாக்கத்தை ஏற்படுத்தும் என்பது உயரிய நோக்கம். காயங்களுக்கு மருந்தாக அவன் புகழைப் பாடலின் பிற்பகுதியில் பாடுகிறார்.

தலைவலையத்து — JR கருத்துரை

By Smt Janaki Ramanan, Pune

To read the meaning of the song thalaivalaiyaththu (தலைவலையத்து) in English, click the underlined hyperlink.

முன்னுரை

குமரக் கோட்டத்தின் கொஞ்சும் எழிலே சரணம். "தலைவலையத்துத் தரம் பெறும்" என்று தொடங்கும் காஞ்சிபுரம் திருத்தலப் பாடல். தலைவன் முருகன் அருணகிரியாரைத் தடுத்தாட்கொண்ட பொழுது, அவர் நொந்த உடலை, நெஞ்சத்தைத் தேற்றி விட்டான். பட்ட காயங்கள் ஆற்றி விட்டான். பரம பக்தனாக மாற்றி விட்டான். ஆனந்த வெள்ளத்தில் திக்குமுக்காடிய அருணகிரியார், அரிய வேண்டுதல்களை அவன் முன் வைக்கின்றார். அவன் திருப்புகழைப் பாடச் சிறந்த கவித்துவம் கேட்கின்றார். தத்துவ ஞானம் வேண்டுகிறார். தர்மநெறி நடக்கும் மாண்பும், அவர் சத்புருஷன் என்று அனைவரும் ஏற்றுக் கொள்ளும் ஏற்றமான நிலையும் வேண்டுகிறார். அவனது அன்னையாம் அம்பிகையின் மகிமைகளையும் மகிழ்ந்து பாடுகிறார். பக்தியும் , தமிழும் பொங்கி வரும் இன்பக் கடலோ இந்தப் பாடல்!

ஓலமறைகள்: JR கருத்துரை

By Smt Janaki Ramanan, Pune

To read the meaning of the song Olamaraigal (ஓலமறைகள்) in English, click the underlined hyperlink.

முன்னுரை

திருவானைக்காவின் திருப்புதல்வா சரணம். "ஓலமறைகள் " என்று தொடங்கும் திருவானைக்கா திருத்தலப் பாடல். ஜம்புகேஸ்வரர் - அகிலாண்டேஸ்வரி என்ற இணையற்ற தாய் தந்தையரின் அருமைப் புதல்வனாய் திருவானைக்காவில் கோயில் கொண்டிருக்கும் முருகன், ஐந்து சன்னிதிகளில் வள்ளி தெய்வானை சமேதராகவும, ஒரு சன்னிதியில் பால தண்டாயுதபாணியாகவும், இன்னொரு புறம் ஒரு சிற்ப அற்புதமாகவும், ஒரே கோவிலில் ஏழு விதமாகத் தரிசனம் தருவது பக்தர்கள் செய்த தவமல்லவா! வெள்ளை யானை வழிபட்ட தலம். வெண் நாவல் மரத்தடியில் ஈஸ்வரனின் திருக்கோலம் என்ற சிறப்புக்கள் கொண்ட இந்தப் புனிதத் தலத்தில் அருணகிரியார் கண்டது தயாபரனின் தண் தேனாம் கருணை ததும்பும் அவன் தாமரைப் பாதங்கள் தானோ! அந்தச் சிலிர்ப்பிலே பிறந்தது இந்தப் பாடலோ! உவமைகளுக்கு அப்பாறபட்டதாய், அந்தக் கழல்கள் இருப்பதாலே கவித்துவத்தை மட்டும் கைக்கொளாமல் தத்துவார்த்தமாக கந்தன் கழலின் அருமைகளைப் பெருமைகளைக் காட்டுகிறார் அருணகிரிநாதர். வேதநாதம் அது; ஞானப் பெருவெளி அது; துரியாதீதம் அது; ப்ரபஞ்சமாய் விரிந்து பரந்து இருப்பது; பரிபூரணம் அது; மோட்சமே அதுதான் என அடுக்கடுக்காய் கந்தனின் கழலிணைகள் பற்றிச் சொல்லும் அரிய பாடல்.